પ્રયાગરાજમાં બુધવારે થયેલી ભીડના હાહાકાર વચ્ચે મહેસાણા જિલ્લાના વિસનગર તાલુકાના કડા ગામના વતની મહેશભાઈ સોમાભાઈ પટેલનું અવસાન થયું. તેઓ હાલમાં સુરતમાં સ્થાયી હતા અને મહાકુંભના સ્નાન માટે પ્રયાગરાજ ગયા હતા. આ દુર્ઘટનામાં તેમની જાન ગુમાવવી પડી છે, જેને કારણે તેમના પરિવારજનોમાં શોકની લાગણી છે.
અમરેલી લેટરકાંડમાં નવી ચકચારી ચર્ચા
પૂર્વ યુવા ભાજપ પ્રમુખ મનીષ વઘાસિયાએ પોલીસ પર ગંભીર આરોપ મૂક્યા છે. મનીષભાઈએ દાવો કર્યો છે કે SP ઓફિસમાં તેમની સાથે મારપીટ કરવામાં આવી હતી અને તેમને દબાણમાં રાખી કેટલીક રાજકીય વ્યક્તિઓના નામ ખુલવવા માટે બળજબરી કરવામાં આવી હતી.
સુરત: નકલી ખાદ્ય પદાર્થોનો ભાંડાફોડ
સુરતના વરાછામાંથી 150 કિલોગ્રામ નકલી પનીરનો જથ્થો ઝડપાયો છે. સાથે જ, પુણા અને સારોલી વિસ્તારના ત્રણ સ્ટોરમાંથી પોલીસે 65 લાખ રૂપિયાના શંકાસ્પદ ઘીનો જથ્થો કબજે કર્યો. આ મામલે વધુ તપાસ માટે ફુડ અને ડ્રગ્સ વિભાગને સેમ્પલ મોકલવામાં આવ્યા છે.
વડોદરામાં જાહેર મારામારીના દ્રશ્યો
રાજમહેલ રોડ પર ત્રાસદાયક ઘટનામાં કારમાં સવાર બે વ્યક્તિઓ અને એક્ટિવા ચાલકે જાહેરમાં મારામારી કરી. આ ઘટનાના વિડીયો વાયરલ થયા બાદ પોલીસે ત્રણે આરોપીઓની ધરપકડ કરી છે.
ડ્રોન ટેકનોલોજીથી ગાંજાના ખેતરોનો પર્દાફાશ
દાહોદ SOG દ્વારા ડ્રોનની મદદથી એક ખેતરમાં ગાંજાના 455 છોડનો પર્દાફાશ કરવામાં આવ્યો છે. પોલીસે કુલ 79 લાખ રૂપિયાના મુદામાલ સાથે બે આરોપીઓને અટકાવ્યા છે.
વિસનગર: BHMS વિદ્યાર્થિનીએ આપઘાત કર્યો
વિસનગરની મર્ચન્ટ હોમિયોપેથીક મેડિકલ કોલેજની પ્રથમ વર્ષની વિદ્યાર્થિનીએ પોતાના હોસ્ટેલના રૂમમાં આપઘાત કર્યો. આ ઘટના બાદ વિદ્યાર્થીઓએ ભારે વિરોધ નોંધાવ્યો અને આચાર્ય વિરુદ્ધ કાર્યવાહી કરવાની માગણી કરી છે. આ આપઘાતનું કારણ હજુ સુધી જાણી શકાયું નથી.
હવામાન ખાતાની આગાહી: માવઠાની સંભાવના
હવામાન વિભાગે આગાહી કરી છે કે 2 અને 3 ફ્રેબ્રુઆરીએ રાજ્યના વિવિધ વિસ્તારોમાં છૂટાછવાયા માવઠાની શક્યતા છે. તેમાં સૌરાષ્ટ્ર, દક્ષિણ ગુજરાત અને ઉત્તર ગુજરાતના 7 જિલ્લા સામેલ છે.
નવસારીમાં આખલાનો આતંક
નવસારી શહેરના મિથીલાનગરી વિસ્તારમાં રખડતા આખલાએ 73 વર્ષીય પેરાલિસિસના દર્દીને ગંભીર રીતે ઘાયલ કર્યા છે. ત્રણ દિવસ પહેલા બનેલી આ ઘટનામાં વૃદ્ધ પોતાના ઘરમાં પ્રવેશી રહ્યા હતા ત્યારે આખલાએ અચાનક હુમલો કરી તેમને શિંગડું મારીને લગભગ 4 ફૂટ ઊંચે ઉછાળ્યા હતા.
