ગુજરાતના વિકાસની ગતિ જ્યાં મેટ્રો અને બુલેટ ટ્રેન સુધી પહોંચી છે, ત્યાં બીજી તરફ નવસારીના વાંસદા તાલુકાના ધરમપુરી ગામના લોકો હજુ પણ પાયાની જરૂરિયાત — “પાકો માર્ગ” — માટે તંત્રના દ્રષ્ટિગોચર બનવાની રાહ જોઈ રહ્યા છે.
ચોમાસામાં ગામના ચાર ફળિયાઓ — ગામિત 1 ફળિયું, ગામિત 2 ફળિયું, ચિકાર ફળિયું અને પુલ ફળિયું —ના લોકો પગદંડી સમા કાદવ-કીચડભર્યા રસ્તાઓ પરથી જીવના જોખમે પસાર થાય છે. ઘણીવાર મૃતકની અંતિમ યાત્રા પણ ખભે લઇ જવાય છે. બાળકો, મહિલા આરોગ્ય કાર્યકરો અને સગર્ભા મહિલાઓ માટે આ રસ્તાઓ જીવલેણ સાબિત થાય છે.
તંત્રને વારંવાર રજૂઆતો છતાં પણ તાજેતરના દિવસો સુધી માત્ર વચનો મળ્યા હતા. પરંતુ હવે આશાનો કિરણ દેખાયો છે. ધરમપુરીના ઝાડી ફળિયાથી ચિકાર ફળિયું થઈને સ્મશાન ભૂમિ સુધી રૂ. 89 લાખના ખર્ચે માર્ગના નિર્માણની મંજૂરી મળી ચૂકી છે. આ કામનું ખાતમુર્હત વલસાડના સાંસદ ધવલ પટેલના હસ્તે થઈ ચૂક્યું છે.
તાલુકા પંચાયત દ્વારા ત્રણ નાના માર્ગો પણ મંજૂર થયા છે અને અન્ય મુખ્ય રસ્તાઓ ટ્રાયબલ સબ પ્લાન હેઠળ મંજૂરી માટે રજૂ કરવામાં આવ્યા છે. ચોમાસા બાદ કામ શરૂ થવાની આશા વ્યક્ત કરવામાં આવી છે.
સ્થાનિક રહેવાસી ચંપક ગામિતના જણાવ્યા અનુસાર, “અમે સદીઓથી રાહ જોઈ રહ્યા છીએ, હવે અમને આશા છે કે આ વેધનાનું અંત આવી જશે.”
સરકાર દર વર્ષે ગ્રામ્ય વિસ્તારોના વિકાસ માટે હજાર કરોડ રૂપિયાનું બજેટ ફાળવે છે. છતાં હજુ પણ ઘણા એવા આદિવાસી પંથકો છે જ્યાં સ્વતંત્રતાના 77 વર્ષ પછી પણ પાયાની સગવડોથી લોકો વંચિત છે.
આગામી પગલાં અને ગ્રામજનોને કેવી આશા
- 4માંથી 3 મુખ્ય માર્ગો અને 6માંથી 3 નાના માર્ગો મંજૂર
- ચોમાસા બાદ નિર્માણ કાર્ય શરૂ થવાની સંભાવના
- તંત્ર તરફથી વધુ મંજૂરી માટે દાવપેચ ચાલુ
