નવસારી શહેરના નાગ તલાવડી વિસ્તારમાં આવેલી પોસ્ટ ઓફિસને અજાણ્યા ઇસમો દ્વારા ઇ-મેલ મારફતે બોમ્બથી ઉડાવી દેવાની ધમકી આપવામાં આવી હોવાનો બનાવ સામે આવ્યો છે. ધમકી મળતા જ સમગ્ર વિસ્તારમાં ચકચાર મચી ગઈ હતી.
માહિતી મળતાં જ પોલીસ તંત્ર તરત જ સક્રિય બન્યું હતું. બોમ્બ ડિસ્પોઝલ સ્ક્વોડ અને ડોગ સ્ક્વોડની ટીમ તાત્કાલિક ઘટના સ્થળે પહોંચી અને પોસ્ટ ઓફિસના પરિસરમાં સઘન તપાસ હાથ ધરી હતી.
સુરક્ષાના પગલે પોસ્ટ ઓફિસને તરત ખાલી કરાવવામાં આવી હતી અને આસપાસના વિસ્તારને પણ પોલીસ દ્વારા કોર્ડન કરી દેવામાં આવ્યો હતો. કોઈ અનિચ્છનીય બનાવ ન બને તે માટે તમામ જરૂરી તકેદારીઓ લેવામાં આવી રહી છે.
ધમકીની જાણ થતા પોલીસ વિભાગના ઉચ્ચ અધિકારીઓ પણ સ્થળ પર દોડી આવ્યા હતા અને સમગ્ર પરિસ્થિતિ પર નજીકથી નજર રાખી રહ્યા છે. ફાયર વિભાગને પણ સ્ટેન્ડ બાય પર રાખવામાં આવ્યું છે.
હાલ પોલીસે ધમકીભર્યા ઇ-મેલ અંગે તપાસ શરૂ કરી છે અને ઇ-મેલ મોકલનાર અજાણ્યા ઇસમોની ઓળખ મેળવવા માટે સાયબર સેલની મદદ લેવામાં આવી રહી છે. વધુ વિગતો તપાસ બાદ જ સામે આવશે.
