ગુજરાત સ્ટેટ મોનિટરિંગ સેલ (SMC) દ્વારા નવસારી જિલ્લાના વાંસદા તાલુકાના ચાપલધરા ગામે રેડ દરમિયાન ગુજરાતમાં સૌપ્રથમ વખત ગાંજા યુક્ત “જોમ્બી ઇ-સિગારેટ”નો કેશ ઉકેલવામાં આવ્યો. આ ઓપરેશન સ્ટેટ મોનિટરિંગ સેલના સિનિયર અધિકારીઓની માર્ગદર્શિકા હેઠળ હાથ ધરવામાં આવ્યું હતું, જે રાજ્યમાં નશીલા પદાર્થો સામેની લડતમાં મહત્ત્વપૂર્ણ સિદ્ધિ બની છે.
કબ્જે કરાયેલ મુદ્દામાલ
• 20 ગાંજા યુક્ત જોમ્બી ઇ-સિગારેટ, જેની બજાર કિંમત અંદાજે ₹20 લાખ છે.
• 80 ગ્રામ હાઈબ્રીડ ગાંજા, જેની બજાર કિંમત ₹8 લાખ છે.
• કુલ મુદ્દામાલની કિંમત: ₹28 લાખ.
ધરપકડ બાદ કરાઈ સખત કાનૂની કાર્યવાહી
આ રેડ દરમિયાન બે આરોપીની ધરપકડ કરવામાં આવી છે. તેઓ પર કાયદા મુજબ પગલાં લેવામાં આવી રહ્યા છે. ગાંજાના વેચાણ અને હેરાફેરીના કિસ્સામાં કડક કાનૂની કાર્યવાહી માટે NDPS અધિનિયમની નીચેની કલમો લાગુ કરવામાં આવી છે:
• કલમ 8(c) – ગેરકાયદેસર ડ્રગ્સના ઉત્પાદન, વેચાણ અને ઉપયોગ પર પ્રતિબંધ.
• કલમ 20(b)(ii) – ગાંજાના જથ્થા સાથેના કિસ્સા માટે દંડાત્મક વ્યવસ્થા.
• કલમ 27 – ગેરકાયદેસર નશીલા પદાર્થના વપરાશ માટે દંડ અને સજા.
ઇ-સિગારેટ અને ગાંજાના કેસને લઇ કડક કાર્યવાહી
ગુજરાતમાં ગાંજા સાથે જોડાયેલી જોમ્બી ઇ-સિગારેટનો આ પ્રથમ કેસ નોંધાયો છે. આ સિગારેટમાં Highly Concentrated Tetra Hydro Cannabinol (THC) પદાર્થનો અંશ છે, જે માનસિક અને શારીરિક અસરકારક છે.
SMCની મહત્ત્વપૂર્ણ ભૂમિકા
રાજ્ય મોનિટરિંગ સેલ દ્વારા ગુજરાતમાં ગેરકાયદેસર નશીલા પદાર્થોના નાશ માટે સતત કામગીરી કરવામાં આવી રહી છે. ગુજરાત સરકાર અને SMCના સિનિયર અધિકારીઓ આ કેસમાં કડક કાર્યવાહી કરી રહ્યા છે, જેથી નશીલા પદાર્થો સામે રાષ્ટ્રીય સ્તરે ઉદાહરણ બેસાડવામાં આવે.
નાગરિકો આટલી વાત થી રહે સાવધાન
ઇ-સિગારેટની ખરીદી, વેચાણ, કે ઉપયોગ પર સંપૂર્ણ પ્રતિબંધ છે. નાગરિકોએ આના પ્રત્યે સાવચેતી રાખવી અને નશીલા પદાર્થોની કોઈપણ ગતિવિધિની જાણકારી હોય તો તાત્કાલિક પોલીસ અથવા રાજ્ય મોનિટરિંગ સેલને જાણ કરવી.
