નવસારીના ચીખલી તાલુકાના સરૈયા ગામે ઉનાળાની રજા માણવા આવેલા સુરતના ત્રણ યુવકો માટે દુર્ભાગ્યજનક ઘટના બની. સુરતથી ફરવા આવેલા ત્રણ મિત્રો સરૈયા ગામે આવેલા ચેકડેમમાં નાહવા પડ્યા હતા. નાહતી વખતે રાજ નાયકા નામનો યુવક અચાનક ઊંડા પાણીમાં ગરક થયો અને ડૂબી ગયો.
સ્થાનિક તરવૈયાઓએ તરત જ બચાવ પ્રયાસો હાથ ધર્યા, પરંતુ ઊંડા પાણીના કારણે રાજને તાત્કાલિક બહાર કાઢી શકાયો નહીં. ભારે જહેમત બાદ તેનું મૃતદેહ બહાર કાઢવામાં આવ્યું. ઘટનાની જાણ થતાં પોલીસ સ્થળ પર પહોંચી હતી અને મૃતદેહને કબજામાં લઈને સિવિલ હોસ્પિટલ ખસેડ્યો હતો, જ્યાં તેનું પોસ્ટમોર્ટમ કરવામાં આવશે.
પોલીસે અકસ્માત મોતનો ગુનો નોંધ્યો છે અને વધુ તપાસ શરૂ કરી છે. આ દુર્ઘટનાથી સમગ્ર વિસ્તારમાં શોકની લાગણી જોવા મળી છે. ઉનાળામાં આવું નુકસાન સર્જાતા સાવચેતી રાખવાની અને સુરક્ષા સાધનો સાથે પાણીમાં પ્રવેશવાની સલાહ આપવામાં આવી રહી છે.
