સુરતમાં ભારે વરસાદને કારણે પ્રભાવિત થયેલા ઓલપાડ તાલુકાના ગામોની વન અને પર્યાવરણ રાજ્યમંત્રી મુકેશ પટેલે લીધી મુલાકાત

દક્ષિણ ગુજરાત સહિત સુરત જિલ્લામાં છેલ્લા દિવસોમાં પડેલા ભારે વરસાદને કારણે કીમ નદીના નીચાણવાળા વિસ્તારોમાં પાણી ભરાયા હતા, જેના અનુસંધાને વન અને પર્યાવરણ રાજ્યમંત્રી મુકેશ પટેલે વરસાદથી પ્રભાવિત થયેલા ઓલપાડ તાલુકાના વડોલી અને ઉમરાછી ગામની મુલાકાત લઈ અસરગ્રસ્ત પરિવારોની સમસ્યાઓની જાણકારી મેળવી હતી.

તેમણે વહીવટીતંત્રના અધિકારીઓને જરૂરી સૂચનો કર્યા હતા અને તંત્ર દ્વારા કરાયેલા બચાવ-રાહત કાર્યોની સમીક્ષા કરી સ્થાનિક અસરગ્રસ્તોને ભોજન, દવા, પીવાના પાણી જેવી જીવનજરૂરી ચીજવસ્તુઓ ઉપલબ્ધ બને એ અંગે કાળજી લીધી હતી.

નોંધનીય છે કે, ઓલપાડ તાલુકાના પૂર પ્રભાવિત ગામોમાં થયેલા નુકશાનનું તંત્ર દ્વારા સર્વે કરવામાં આવી રહ્યો છે. એક જ દિવસમાં ૩૦૦ થી વધુ ઘરોનો સર્વે કરાયો છે, તેમજ પાણી ભરાયેલા ગામના લોકોની આરોગ્યની તપાસ કરવામાં રહી છે. ગંદકીવાળા સ્થળો પર દવાનો છંટકાવ કરવામાં આવી રહ્યો છે.

મુલાકાત દરમિયાન વન અને પર્યાવરણ રાજ્યમંત્રી મુકેશ પટેલે જણાવ્યું હતું કે, દક્ષિણ ગુજરાતમાં ભારે વરસાદની સ્થિતિમાં ઉપરવાસમાંથી પાણી આવતાં કીમ નદીએ રૌદ્ર સ્વરૂપ ધારણ કરતાં ઓલપાડ તાલુકાના કીમ, કઠોદરા, કીમામલી, અણીતા, ઉમરાછી અને વડોલી ગામમાં પાણી ભરાવાની સમસ્યા ઉભી થઇ છે.

ઓલપાડ તાલુકાના પૂર પ્રભાવિત અને વરસાદી પૂરમાં ફસાયેલા લોકોને સહીસલામત જગ્યા પર ખસેડવામાં આવ્યા છે, તેમના માટે રહેવા, જમવા, દવા જેવી જરૂરી ચીજવસ્તુઓની પૂરતી વ્યવસ્થા કરવામાં આવી છે. મંત્રીશ્રીએ વહીવટીતંત્રને સતર્ક રહેવા અને અસરગ્રસ્ત લોકોની સતત કાળજી લેવા અનુરોધ કર્યો હતો.