નવસારી જિલ્લામાં સ્થાનિક સ્વરાજ્યની ચૂંટણીને લઈ ભાજપે ઉમેદવારોની યાદી જાહેર કરી છે. ચૂંટણી માટે ઉમેદવારોના નામ જાહેર થતાં રાજકીય ગરમાવો વધ્યો છે. ભાજપે તમામ વોર્ડમાં જીત હાંસલ કરવાની વ્યૂહરચના સાથે અનુભવી તેમજ નવા ચહેરાઓને તક આપી છે.
એક મહાનગરપાલિકા, એક જિલ્લા પંચાયત, 6 તાલુકા પંચાયત અને એક નગરપાલિકા માટે ઉમેદવારોના નામ જાહેર થયા છે.
નવસારી મહાનગરપાલિકાના કુલ 13 વોર્ડ માટે 52 ઉમેદવારો જાહેર કરવામાં આવ્યા છે. જિલ્લા પંચાયત માટે 30 ઉમેદવારોના નામોની જાહેરાત કરવામાં આવી છે. તાલુકા પંચાયત હેઠળ નવસારી, જલાલપોર, ગણદેવી, ચીખલી, ખેરગામ અને વાંસદા તાલુકાઓના ઉમેદવારો જાહેર થયા છે. કુલ 132 ઉમેદવારોને તક આપવામાં આવી છે.
ગણદેવી નગરપાલિકાના 6 વોર્ડ માટે 24 ઉમેદવારોની યાદી બહાર પાડવામાં આવી છે. આ વખતે ભાજપે મોટા ફેરફારો કર્યા છે. ત્રણ વખત ચૂંટણી લડેલા ઘણા જૂના ચહેરાઓને ટિકિટ આપવામાં આવી નથી. વય મર્યાદા પણ ધ્યાનમાં રાખવામાં આવી છે, જેમાં 68 વર્ષથી વધુ ઉંમરના ઉમેદવારોને સ્થાન આપવામાં આવ્યું નથી.
પાર્ટીના કેટલાક જાણીતા નેતાઓ જેમ કે જીગીશા, મીનલબેન દેસાઈ અને જગદીશ મોદી જેવા નામો પણ યાદીમાંથી બહાર રહ્યા છે. દક્ષિણ ગુજરાતમાં સંગઠનાત્મક રીતે સક્રિય રહેલા અશોકભાઈ ધોરાજીયાને મહત્વપૂર્ણ તક આપવામાં આવી છે.
મેયર પદ માટે તેમનું નામ લગભગ નિશ્ચિત માનવામાં આવી રહ્યું છે. અશોકભાઈ ધોરાજીયાએ નવસારી, વલસાડ, ડાંગ, તાપી અને સુરત જિલ્લામાં પાર્ટી માટે સક્રિય કામગીરી કરી છે.
આ વખતે ભાજપે લગભગ 70% નવા ચહેરાઓને તક આપી છે, જેથી યુવા અને નવી ઊર્જા સાથે ચૂંટણીમાં ઉતરવાની તૈયારી દર્શાવી છે.
નવસારી મહાનગરપાલિકામાં કુલ 13 વોર્ડોમાં ચૂંટણી યોજાવાની છે, જેમાં દરેક વોર્ડમાંથી અનેક ઉમેદવારો મેદાનમાં ઉતરશે. વોર્ડ નં. 1 થી લઈને અંતિમ વોર્ડ સુધી ભાજપે સ્થાનિક સ્તરે સક્રિય રહેલા કાર્યકરોને પ્રાથમિકતા આપી છે. ખાસ કરીને શહેરના વિકાસ, સ્વચ્છતા અને આધુનિક સુવિધાઓને ધ્યાનમાં રાખીને ઉમેદવારોની પસંદગી કરવામાં આવી હોવાનું પક્ષના સૂત્રોએ જણાવ્યું છે.
પાર્ટી દ્વારા જાહેર કરાયેલી યાદી અનુસાર દરેક વોર્ડમાં જીત માટે મજબૂત ગણાતા ઉમેદવારોને પસંદ કરવામાં આવ્યા છે. સ્થાનિક મુદ્દાઓ જેમ કે પાણી, રસ્તા, ગટર વ્યવસ્થા અને આરોગ્ય સેવાઓને ધ્યાનમાં રાખીને ચૂંટણી પ્રચારની રણનીતિ તૈયાર કરવામાં આવી રહી છે.
નવસારી મહાનગરપાલિકાની ચૂંટણીમાં ભાજપ ઉપરાંત અન્ય રાજકીય પક્ષો પણ મેદાનમાં ઉતરવાના હોવાથી ટક્કર રસપ્રદ બનવાની શક્યતા છે.
