નવસારી જિલ્લાના ગણદેવા વિસ્તારમાં એક દુકાનમાં ગેરકાયદેસર રીતે જ્વલનશીલ પ્રવાહી રાખવામાં આવી રહી હોવાના સમાચાર મળ્યા હતા. આ બાતમીના આધારે એલસીબીની ટીમે સ્થળ પર રેડ કરી, 500 લીટર થીનર તથા ટર્પેન્ટાઇન પ્રવાહીનો જથ્થો, જેની કિંમત લગભગ રૂ. 27,900 છે, ઝડપી પાડ્યો.
નવસારી એસપી દ્વારા એલસીબીના સિનિયર પીઆઈ વી.જે. જાડેજાને આ ગેરકાયદેસર પ્રવૃત્તિ અટકાવવાના નિર્દેશ આપવામાં આવ્યા હતા. 19 માર્ચના રોજ હેડ કોન્સ્ટેબલ નયકુમાર હનુભા અને પોલીસ કોન્સ્ટેબલ ગોવિંદભાઈ રાજાભાઈને મળેલી બાતમીના આધારે આ કામગીરી હાથ ધરવામાં આવી.
બાતમી અનુસાર, ગણદેવા ગામના લીમડા ચોક વિસ્તારમાં દિપકભાઈ મોહનલાલ બોલીવાલ નામના વેપારી ગેરકાયદેસર રીતે જ્વલનશીલ પદાર્થ વેચાણ માટે સંગ્રહ કરી રહ્યા હતા. રેડ દરમિયાન તેમણે કોઈ પણ પ્રકારની પરમિશન કે ફાયર સેફ્ટી સાધનો વિના આ સામાનનો જથ્થો રાખેલો હોવાનું બહાર આવ્યું.
પોલીસે દિપકભાઈ મોહનલાલ બોલીવાલને, જેમનું મૂળ નિવાસ રાજસ્થાન છે, જ્વલનશીલ પ્રવાહીના 500 લીટરના ગેરકાયદેસર જથ્થા સાથે પકડી પાડ્યા છે. વધુ તપાસ અને આરોપીના રીમાન્ડ મેળવવા માટે તજવીજ હાથ ધરવામાં આવી છે.
