દક્ષિણ ગુજરાતમાં ભારે વરસાદના કારણે નવસારી જિલ્લામાં અનેક નાની-મોટી નદીઓમાં નવા નીર ઉમેરાયા છે. જેના પરિણામે પંચાયતના હસ્તકના કુલ 19 રસ્તાઓ ઓવરટોપીંગના કારણે અવરોધાયા છે.
વિગતવાર અવરોધાયેલા રસ્તાઓ:
- વાંસદા તાલુકા: 14 રસ્તાઓ
- નવસારી તાલુકા: 2 રસ્તાઓ
- ચીખલી તાલુકા: 2 રસ્તાઓ
- ખેરગામ તાલુકા: 1 રસ્તો
વૈકલ્પિક માર્ગો અને સુરક્ષા વ્યવસ્થા:
નવસારી જિલ્લા તંત્ર દ્વારા નાગરિકોને અનુરોધ કરવામાં આવ્યો છે કે તેઓ અવરોધિત રસ્તાઓનો ઉપયોગ ટાળી વૈકલ્પિક માર્ગો અપનાવે.
નવસારી જિલ્લામાં ભારે વરસાદને કારણે વિવિધ તાલુકાઓમાં માર્ગ અને મકાન વિભાગના માર્ગ વાહનવ્યહાર માટે બંધ કરવામાં આવ્યા હતા. વાંસદા તાલુકાના કાળાઆંબા વાટી રોડ પર અંબિકા નદી પર કોઈ સ્ટ્રકચર ન હોવાથી રાહદારી માટે વિકલ્પ તરીકે વાટી થી ડુંગરડા, વઘઈથી વાંસદા માર્ગ દર્શાવાયો હતો. આ માર્ગ 23 કિમી લાંબો છે અને નદીમાં પાણીનું પ્રવાહ અટક્યા બાદ ફરી ચાલુ થશે.
વાંસદાના અન્ય માર્ગો જેમ કે મહુવાસ-સરા, વાંદરવેલા-દોણજા, અને મોળાઆંબા-બોપી જેવા માર્ગો પણ કોઝવે ઓવરટોપિંગને કારણે બંધ છે. વિકલ્પ રૂપે આસપાસના માર્ગોની વ્યવસ્થા કરવામાં આવી છે, જેની લંબાઈ 4 કિમીથી 14 કિમી સુધીની છે. અંબિકા નદી અને અન્ય સ્થળોએ પાણીના પ્રવાહ બંધ થતા એ માર્ગો ફરી શરૂ થવાની ધારણા છે.
ચીખલી તાલુકામાં વેલણપુર એપ્રોચ રોડ ઉપર કોઝવે ઓવરટોપિંગને કારણે અવરોધ થયો છે, જ્યારે નવસારી તાલુકાના સુપા કુરેલ રોડ પર બોક્ષ કલવટમાં પાણી ભરાયા છે. ખેરગામમાં તોરણવેરા પારી ખટાણા માર્ગ ડાયવર્ઝન ધોવાઈ જવાને કારણે બંધ છે.
આ તમામ માર્ગોમાં જળપ્રવાહ અટક્યા પછી અથવા જરૂરી મરમત્તાના કામો પૂર્ણ થયા બાદ ટ્રાફિક શરૂ થવાની ધારણા છે. ખાસ કરીને વાંસદા તાલુકામાં સૌથી વધુ 14 માર્ગો પર અસર જોવા મળી છે, જ્યારે અન્ય તાલુકાઓમાં માર્ગ બંધ થવાના કારણે હાલ વૈકલ્પિક વ્યવસ્થાઓની જાણકારી આપવામાં આવી છે.
આ તમામ વિસ્તારોમાં પોલીસ બંદોબસ્ત ગોઠવવામાં આવ્યો છે.
દક્ષિણ ગુજરાતમાં વરસાદી માહોલ જામ્યો છે. નવસારી જિલ્લાના ઉપરવાસ સુરત, ડાંગ અને તાપી જિલ્લામાં વરસાદને કારણે નદીઓમાં નવા નીર આવ્યા છે.
નવસારીની પૂર્ણા નદીમાં પાણીની આવક વધતા શહેરને અડીને આવેલા સુપા-કુરેલને જોડતો લો લેવલ બ્રિજ પાણીમાં ગરકાવ થઈ ગયો છે. આ કારણે આજુબાજુના 5 ગામના લોકોને પોતાના ગંતવ્ય સુધી પહોંચવા માટે 10 કિલોમીટરનો વધારાનો માર્ગ કાપવો પડી રહ્યો છે.
સ્થાનિક રહીશોએ જણાવ્યું કે છેલ્લા ઘણા વર્ષોથી સુપા-કુરેલ સહિતના અનેક ગ્રામ્ય વિસ્તારના લોકોએ ઊંચો બ્રિજ બનાવવાની માંગણી કરી છે. જોકે, આ સમસ્યાનો હજુ સુધી કોઈ ઉકેલ આવ્યો નથી. ચોમાસા દરમિયાન દર વર્ષે આ સમસ્યા સર્જાય છે, જેના કારણે સ્થાનિક લોકોને ભારે હાલાકી ભોગવવી પડે છે.
હેલ્પલાઇન સેવાઓ:
- ટોલ ફ્રી નંબર: 1077
- નવસારી જિલ્લાનો હેલ્પલાઇન નંબર: 02637-233002/259401
જિલ્લા તંત્ર નાગરિકોને સલામતી માટે સાવચેત રહેવા અને તાકીદની પરિસ્થિતિમાં આ નંબર પર સંપર્ક કરવા વિનંતી કરે છે.
