સુરતના ઓલપાડ તાલુકાના કુંકણી ગામની ફાઉન્ટન હેડ સ્કૂલમાં ધોરણ 12ના વિદ્યાર્થીઓની વિદાય સમારંભ દરમિયાન જાહેરમાં કાયદાના લીરા ઉડાવવાના બનાવે ભારે ચર્ચા જગાવી છે. 30 જેટલી બીએમડબલ્યુ, મર્સિડિઝ અને સ્કોડા જેવી લક્ઝરી કાર સાથે વિદ્યાર્થીઓએ જાહેરમાં સ્ટંટબાજી કરી હતી, જેના વીડિયોએ સોશિયલ મીડિયા પર તહેલકા મચાવ્યો છે.
વિદ્યાર્થીઓ સ્કૂડાની ટોપ પર ચડી સ્ટંટ કરતા અને એકસાથે 30 જેટલી કાર રસ્તા પર દોડાવતા દેખાયા હતા. આ ઘટનાથી રસ્તા પર ચાલતા અન્ય વાહનચાલકોને પણ મુશ્કેલીનો સામનો કરવો પડ્યો હતો. આ કાફલો ફાઉન્ટન હેડ સ્કૂલ સુધી પહોંચ્યો, જેમાં મોટી સંખ્યામાં લક્ઝરી કાર સામેલ હતી.
કાયદાકીય મંજૂરી વિના રસ્તા પર સર્જાયો વિપલવ
આ સમગ્ર ઘટના વિના કોઈ મંજૂરી થઈ હોવાની વાત સામે આવી છે. પોલીસ અધિકારીઓએ જણાવ્યું કે આ પ્રકારની ગતિવિધિઓ માટે કોઈ પરવાનગી લેવામાં આવી ન હતી. જો વાહન વ્યવહારના નિયમો તોડવામાં આવ્યા હશે તો તેના માટે કાયદેસર કાર્યવાહી કરવામાં આવશે.
View this post on Instagram
સ્કૂલનું નિવેદન
સ્કૂલના પ્રશાસનના મતે, વિદાય સમારંભ માટે તેઓએ માત્ર સ્કૂલ બસ મોકલી હતી, પરંતુ વિદ્યાર્થીઓએ પોતાની ગાડીઓનો ઉપયોગ કર્યો. તેમણે કહ્યું કે, “આ આયોજન સ્કૂલ દ્વારા કરાયું ન હતું, અને અમે કોઈપણ લક્ઝરી કાર સ્કૂલ કેમ્પસમાં પ્રવેશવા દીધી નહોતી.”
આ ઘટના સુરતમાં રોડ પર વાહન વ્યવહારના નિયમો અને જવાબદારી પર પ્રશ્નો ઉભા કરે છે, અને શહેરીજનોની સુરક્ષાની દિશામાં ગંભીર ચિંતાઓ પ્રગટ કરી છે.
