નવસારી શહેરનું લુન્સિકુઇ ગ્રાઉન્ડ વર્ષોથી લોકો માટે મોર્નિંગ વોક, ઈવનિંગ વોક અને પરિવાર સાથે સમય પસાર કરવાની સૌથી પસંદગીની જગ્યા તરીકે ઓળખાતું રહ્યું છે. સવારે અને સાંજે અહીં મોટી સંખ્યામાં લોકો ફરવા, કસરત કરવા તેમજ ખુલ્લા વાતાવરણમાં બેસીને સમય વિતાવવા માટે આવતા હોય છે.
લુન્સિકુઇ ગ્રાઉન્ડની ખાસ ઓળખ તેની આખા ગ્રાઉન્ડની ફરતે આવેલી પાળી હતી. ખાસ કરીને રાત્રિના સમયે પરિવાર, યુવાનો અને વડીલો અહીં બેસીને ઠંડકભર્યા વાતાવરણનો આનંદ માણતા હતા. શહેરમાં ખુલ્લા વાતાવરણ સાથેનું આવું વિહાર સ્થળ અન્ય ક્યાંય ઉપલબ્ધ ન હોવાથી લુન્સિકુઇ લોકો માટે ખાસ આકર્ષણનું કેન્દ્ર બન્યું હતું.
અહીં રાત્રિના સમયે ચાલતી ખાણી-પીણીની લારીઓ અને નાનાં વેપારીઓનો ધંધો પણ વિસ્તારના માહોલમાં જીવંતતા ઉમેરતો હતો. લોકો પરિવાર સાથે ફરવા આવતાં અને સાથે સ્ટ્રીટ ફૂડનો આનંદ માણતાં હોવાથી લુન્સિકુઇ માત્ર ગ્રાઉન્ડ નહીં પરંતુ શહેરના સામાજિક જીવનનું મહત્વપૂર્ણ કેન્દ્ર બની ગયું હતું.
પરંતુ હવે ગ્રાઉન્ડની પાળી ઉપર લોખંડની ગ્રીલ ફિટ કરવામાં આવતા લોકોમાં નિરાશા જોવા મળી રહી છે. ગ્રીલ લગાવાયા બાદ લોકો માટે પાળી ઉપર બેસવાની જગ્યા લગભગ બંધ થઈ ગઈ છે, જેના કારણે રાત્રિના સમયે અહીં અગાઉ જેવો માહોલ હવે જોવા મળતો નથી.
સ્થાનિક લોકોનું કહેવું છે કે વડીલો માટે હવે અહીં આરામથી બેસી શકાય તેવી કોઈ સુવિધા બચી નથી. બાળકો પણ જો પાળી ઉપર બેસે તો સાવધાની રાખવી પડે તેવી સ્થિતિ સર્જાઈ છે. લોકો માને છે કે સુરક્ષા માટે લેવાયેલ આ નિર્ણયથી લુન્સિકુઇનો ખુલ્લો અને આનંદમય માહોલ હવે ધીમે ધીમે ખોવાઈ રહ્યો છે.
1 Comment
ભાઈ જરા વિજલપોર બાજુ પણ નઝર નાખજો નવસારી નો પશ્ચિમ વિસ્તાર માં ઘણા કામો બાકી છે, એક તો ઓવરબ્રિજ, ત્રણ વર્ષ થી કામ ચાલે છે, ઘેલખડી તળાવ, એરૂ ચાર રસ્તા પર ટ્રાફિક સમસ્યા, કૉલેજ પાસે નો walkve, આવા ઘણા બધા કામો કરવાના છે, જે નવા ચૂંટાયેલા પ્રતિનિધિ ઓ પાસે પ્રજા અપેક્ષા રાખે છે, અમારા ધર્મેશભાઈ ખુબ મેહનતું છે, પણ ઉપલા લેવલ થી સહકાર મળવો જોઈએ 🙏આભાર 🙏વંદેમાતરમ 🙏ભાતમતાકી જય 🙏